АНҶУМАНИ МУҲОҶИРОНИ МЕҲНАТИИ ТОҶИК БО ЧӢ АНҶОМ ЁФТ?

                     Душанбе, 19 ноябр (АМИТ «Ховар», А.Ҳаитов) — Рӯзи 17 ноябри соли 2009 дар шаҳри Москави ФР Анҷумани ғайринавбатии Ҳаракати «Муҳоҷирони меҳнатии тоҷик», ки роҳбарии онро Каромат Шарифов ба ӯҳда дорад, баргузор гардид. Тавре, ки роҳбарони ин Ҳаракат қаблан изҳор мекарданд, Анҷуман ҷиҳати муттаҳид сохтани ҷонибдоронаш мусоидат мекард. Аммо ғайри интизор Анҷуман бо хархаша ва ихтилофи роҳбарияти ҳаракат оғоз шуд. Қабл аз саршавии кори Анҷуман яке аз роҳбарони Ҳаракат Ҳоким Муҳаббатов бо изҳорот баромад намуда, Анҷуманро намоишкорона тарк гуфт. Ӯ аз қонуншиканиҳои К. Шарифов ёдовар шуда, изҳор дошт, ки ин Анҷуман ғайриқонунӣ мебошад ва иштирокчиёни онро даъват кард, то ба ӯ пайравӣ намоянд. Ин даъвати ӯ аз ҷониби баъзе иштирокдорон, аз ҷумла раиси Комиссияи назоратию санҷишии Ҳаракат Махсумов Азим дастгирӣ ёфт. Номбурда низ тарки ҷаласа намуд. Гуфтаҳои боло далели он аст, ки Ҳаракати «Муҳоҷирони меҳнатии тоҷик», аз он обрӯю иттиҳоде, ки изҳор медоранд, бархӯрдор нестанд.