БАРРАСИИ БАРОБАРҲУҚУҚИИ ЗАНУ МАРД ДАР ТОҶИКИСТОН

                   Душанбе, 26 ноябр. (АМИТ «Ховар», Бекназари Абӯбакр). — Имрӯз дар шаҳри Душанбе дар мавзӯи «Иҷрои Барномаи давлатии «Самтҳои асосии сиёсати давлат оид ба таъмини ҳуқуқу имкониятҳои баробари мардҳо ва занҳо дар Ҷумҳурии Тоҷикистон дар солҳои 2001-2010: мақсадҳои гузошташуда ва натиҷаҳои бадастомада» мизи мудаввар баргузор гардид.                     Ҳадафи асосии ин мизи мудаввар — муҳокимаи натиҷаҳои монитиринги ҷамъиятӣ ва арзёбии иҷрои Барномаи давлатии «Самтҳои асосии сиёсати давлат оид ба таъмини ҳуқуқу имкониятҳои баробари мардҳо ва занҳо дар Ҷумҳурии Тоҷикистон дар солҳои 2001-2010» ва муайян намудани чораю тадбирҳои минбаъда оид ба таъмини баробарҳуқуқии ҳақиқии занҳо ва мардҳо дар Тоҷикистон буда, он бо ташаббуси Иттифоқи ташкилотҳои ҷамъиятии «Аз баробарии ҳуқуқӣ ба баробарии воқеӣ» дар ҳамкорӣ бо Кумитаи кор бо занон ва оилаи назди Ҳукумати Ҷумҳурии Тоҷикистон бо дастгирии ЮНИФЕМ ва ДФИД гузаронида шуд.                      Дар мизи мудаввар таъкид гардид, ки ба туфайли қабул гардидани Фармони Президенти Ҷумҳурии Тоҷикистон Эмомалӣ Раҳмон аз 3 декабри соли 1999 «Дар бораи баланд бардоштани нақши зан дар ҷомеа» фаъолияти пешбарӣ ва ҳифзи ҳуқуқҳои занон ҷоннок гардид.                      Натиҷаҳои мониторинги ҷамъиятӣ нишон доданд, ки як қатор чорабиниҳои Барномаи давлатй, мутаассифона, ҳанӯз ҳам иҷро карда нашудаанд. Дар роҳи пешрафти занон ва ба даст овардани баробарҳуқуқии ҳaқиқии онҳо бо мардҳо монеаҳо бисёранд. Тоҷикистон аз марҳалаи якуми ташаккули сиёсати гендерӣ гузашта, барои пешбурди баробарии гендерӣ асосҳои қонунгузорӣ ба вуҷуд оварда шуд. Аммо ҳоло марҳалаи басо масъулиятнок дар пеш истодааст — марҳалаи иҷрои нақшаҳои стратегии қабулшуда, қонуну барномаҳо, ки ин интихоби усулҳои самараноки татбиқи онҳо ва муносибати мушаххасро бо назардошти хусусиятҳои мушкилоти гендерӣ дар соҳаҳои гуногун талаб мекунад.                     Иштирокчиёни мизи мудаввар ба мубрамии проблемаҳои идоракунии кадрҳои идоракунанда, аз ҷумла баланд бардоштани нерӯи кадрӣ дар таҳияи стратегияҳои гендерӣ ва иҷрои сиёсати гендерӣ дар мақомоти ҳокимияти давлатӣ таваҷҷӯҳ зоҳир намуда, зарурати таҳияи Барномаи нави Президентии «Тайёр кардани кадрҳои идоракунӣ»-ро пешниҳод карданд.