ДОНИШКАДАҲОИ НАВИ ТЕХНИКӢ КУШОДА МЕШАВАНД

                 Душанбе, 10 ноябр. (АМИТ «Ховар», Люмила Дубинина). — Тавре ба мухбири АМИТ «Ховар» роҳбари раёсати муносибатҳои байналхалқии вазорати маорифи Ҷумҳурии Тоҷикистон Тамара Насимова иттилоъ дод, дар ҷумҳурӣ ифтитоҳи филиали ду Донишкадаи Федератсияи Русия дар назар дошта шудааст. Чунончӣ, дар заминаи яке аз факултаҳои Донишгоҳи техникии Тоҷикистон ба номи академик М.Осимӣ, филиали Донишкадаи пӯлод ва хулагии шаҳри Маскав кушода мешавад. Ҳамчунин дар ояндаи наздик дар шаҳри Турсунзода филиали Донишкадаи энергетикии Маскав фаъолият хоҳад кард.                  Мувофиқи маълумоти сарчашма, лоиҳаи Созишнома оид ба фаъолияти филиалҳои Донишкадаҳои техникии Русия дар ҳудуди Тоҷикистон аз ҷониби вазорат ва идораҳои дахлдори мамлакат мавриди омӯзиш ва баррасӣ қарор гирифтааст. Ҳоло, масъалаҳои таъсис ва муайян кардани дастгоҳи маъмурӣ — хоҷагӣ, инчунин тартиби сармоягузории донишкадаҳо аз ҷониби тарафҳо баррасӣ мешаванд.                    Қобили зикр аст, ки мувофиқи Созишномаи Донишкадаи иқтисодии Тоҷикистон оид ба ҳамкорӣ бо Донишгоҳи миллии иқтисодии Харков ва Донишгоҳи давлатии иқтисодии Урал ба наздикӣ ифтитоҳи филиалҳои ин Донишгоҳҳо дар ҳудуди Тоҷикистон дар назар дошта шудааст.                    «Бояд гуфт, ки имконияти кушодани филиали Донишкадаҳои Тоҷикистон дар хориҷи мамлакат низ мавҷуд буда аз ҷониби мутахассисон ин ҳолат омӯхта мешавад» , — гуфт Тамара Насимова.