ВАЗЪИ ТАЪМИНОТ БО БАРҚ

                Душанбе 9 ноябр. (АМИТ «Ховар», Фирдавс Таваров) — Тавре аз ин пеш хабар дода будем, то ба имрӯз системаи энергетикии Тоҷикистон аз ягон ҷумҳурии ҳамсоя барқ нагирифта истодааст ва имрӯзҳо танҳо бо истифода аз иқтидорҳои худӣ кор мекунад. Дар ҷумҳурӣ, айни ҳол ҳар шабонарӯз ба ҳисоби миёна то 38 — 40 миллион киловатт соат нерӯи барқ истеҳсол карда мешавад, ки ин нисбат ба истеҳсолоти ҳаррӯзаи соли гузашта 3-3,5 миллион киловатт зиёд аст.                Аз рӯи маълумоти охирин, ҷумҳурии Ӯзбекистон аз 1 декабри соли ҷорӣ нияти аз Системаи муттаҳидаи электроэнергетикии давлатҳои Осиёи Марказӣ баромаданро дорад. Ин маънои онро дорад, ки « Ӯзбекэнерго» тамоми ӯҳдадориҳои то ин вақт ба имзо расидаро сарфи назар менамояд. Ба ғайр аз ин, тавре маълум аст, мутобиқи шартнома Туркманистон мебоист ҳар сол дар давраи тирамоҳу зимистон ба кишвари мо то 1 миллиарду 200 миллион кВт.соат нерӯи барқ интиқол медод. Дар сурати аз система баромадани ҷумҳурии Ӯзбекистон ин амал низ аз ҷиҳати техникӣ ғайриимкон хоҳад буд.                  ШСХК «Барқи тоҷик» бори дигар ба мардуми кишвар муроҷиат менамояд, то вазъияти системаи энергетики хуб дарк намоянд ва аз барқи мавҷуда тариқи лампаҳои каммасраф сарфакорона истифода баранд.