ЗУКОМИ ХАФВНОК ПАҲН МЕШАВАД?

                 Душанбе, 5 ноябр (АМИТ «Ховар» — mirtv,svpressa.ru.) – Тавре ки хабаргузориҳои хориҷӣ иттиллоъ медиҳанд, 4 ноябри соли ҷорӣ духтурони Ҷумҳурии Қирғизистон аз қатораи самти «Маскав – Бишкек» 7 нафар мусофирро бо гумони гирифтор шудан ба бемории сироятии А/Н 1 N 1 (зукоми хук) ба беморхона интиқол доданд.                  Дар баробари ҳамин табибони Ҷумҳурии Украина оид ба 13 ҳодисаи мубталошавии одамон ба ин бемории хавфовар ва фавти як нафар бемор хабар доданд. Мувофиқи маълумоти Вазорати тандурустии ин кишвар айни замон дар қисмати ғарбии Украина қариб 80 ҳазор гирифторони бемории зуком (ОРВИ) ба қайд гирифта шуданд. Бинобар ҳамин дар 9 вилояти Ҷумҳурии Украина низоми карантин эълон ва таълим дар 2403 мактабҳои таълимоти умумӣ барои зиёда аз 1 миллион талаба манъ карда шуд.                Ҳамчунин дар Ҷумҳурии Озарбойҷон як нафари аз Украина бозгашта хамчун гирифтори бемории зукоми хук ба беморхона равон карда шуд. Дар ҷумҳурии Қазоқистон бар зидди паҳншавии бемории зукоми хук чораҳои фаврӣ дида мешаванд.                Умуман, аз ибтидои паҳншавии ин бемории хавфовар дар Аврупо фавти 204 бемор ва дар тамоми ҷахон фавти 4,5 ҳазор беморони гирифтори зукоми хук ба қайд гирифта шудааст. Шумораи умумии гирифторони бемории А/Н 1 N 1 (зукоми хук) дар тамоми ҷаҳон 378 ҳазорро ташкил медиҳад.