ҲАМКОРИИ ТОҶИКИСТОНУ РУСИЯ ДАР МУБОРИЗА БА МУҚОБИЛИ МАВОДИ НАШЪАДОР

                  Душанбе, 4 декабр. (АМИТ «Ховар», Фирдавс Таваров). — Дирӯз, 3 декабр дар Агентии назорати маводи нашъадори назди Президенти Ҷумҳурӣ созишномаи ҳукуматҳои Ҷумҳурии Тоҷикистон ва Федератсияи Русия дар бораи ҳамкорӣ дар мубориза ба муқобили хариду фурӯши ғайриқонунии маводи нашъадор, воситаҳои фалаҷкунандаи асаб ва ашёи хоми онҳо имзо карда шуд.                    Мухбири АМИТ «Ховар» хабар медиҳад, ки созишномаи мазкурро аз ҷониби Тоҷикистон директори Агентии назорати маводи нашъадори ҷумҳурӣ, генерал – лейтенант Рустам Назаров ва аз ҷониби Русия сафири кабири ин мамлакат Юрий Попов имзо карданд.                   Созишнома ҳамкории ҳамаҷонибаи мақомоти салоҳиятдори Тоҷикистону Русияро дар бобати дастраси ҳамдигар гардонидани маълумоти зарурӣ, гузаронидани амалиёти муштарак барои бастани роҳҳои интиқол ва қочоқи маводи нашъадор, иваз кардани таҷрибаи ҳамдигар, ташкили мулоқотҳои корӣ, гузаронидани машварату конфронсҳо ва семинарҳо ва ғайраро пешбинӣ менамояд.                    Қайд кардан лозим аст, ки мақомоти дахлдори ҳар ду мамлакат дар тамоми тадбирҳои зидди маводи нашъадори дар доираи ИДМ, СААД, СҲШ ва созмонҳои дигар гузаронидашаванда фаъолона иштирок менамоянд.