ҲАМКОРИҲОИ НАВИ ТОҶИКИСТОНУ ЧИН ДАР ВИЛОЯТИ СУҒД

                  Душанбе, 12 январ. (АМИТ «Ховар», Лаззат Диловарзод).- Ҳукумати Ҷумҳурии Тоҷикистон бобати ҳамкориҳои нав бо Ҷумҳурии Мардумии Чин шартномаеро ба имзо расонид, ки тибқи он аз соли 2010 сар карда, мутахассисони чинӣ ба мумфаршкунии роҳҳои чор ноҳия дар вилояти Суғд шурӯъ мекунанд, ки он арзиши 15 млн. доллари амрикоиро дорад. Тибқи шартнома, Ҷумҳурии Мардумии Чин бо арзиши 15 млн. доллари амрикоӣ дар соҳили рости дарёи Сир мардуми шаҳри Хуҷандро бо оби тозаи ошомиданӣ таъмин хоҳад кард. Ҳамчунин дар асоси шартномаи мазкур ба маблағи 3 миллион доллари амрикоӣ автобусҳои чинӣ харидорӣ мегарданд.                   Бино ба гуфти муовини раиси шаҳри Хуҷанд Домулло Ҷабборов, маблағи шартнома беш аз 33 млн. доллари амрикоӣ буда, аз қарзҳои дарозмӯҳлат дар ин вилояти ҷумҳурӣ маҳсуб меёбад.