БА ПОЙТАХТ ТЕХНИКАҲОИ КОММУНАЛӢ ВОРИД КАРДА ШУД

                 Душанбе, 20 январ.(АМИТ «Ховар», Марзия Саидова). –Ба пойтахт аз ҷамъияти саҳҳомии кушодаи «Заводи истеҳсоли мошинҳои коммуналии шаҳри Мтсенск»-и Федератсияи Русия 48 адад техникаи коммуналӣ ва 24 адад контейнерҳои партовҷамъоварӣ барои эҳтиёҷоти раёсатҳои истифодабарии роҳҳои ноҳияҳои пойтахт ворид карда шуд. Дар робита дар пойтахт расми ба истифодабарии техникаҳои коммуналӣ баргузор шуд. Мутаносибан ба ноҳияҳои И.Сомонӣ ва Сино 14 ададӣ, Шоҳмансур 12 адад ва ноҳияи Фирдавсӣ бошад 8 адад техникаи коммуналӣ тақсим карда шуданд.                   Аз хадамоти матбуоти Раиси шаҳри Душанбе ба АМИТ «Ховар» иттилоъ доданд, ки техникаҳои мазкур тибқи қарордоди имзонамудаи Мақомоти иҷроияи ҳокимияти давлатии шаҳри Душанбе ва Ҷамъияти саҳҳомии кушодаи «Заводи истеҳсоли мошинҳои коммуналии шаҳри Мтсенск»-и Федератсияи Русия ба пойтахт оварда шуданд.                  Мавриди зикр аст, ки техникаи коммуналӣ ва контейнерҳо ба маблағи 11 миллиону 532 ҳазору 771 сомонӣ аз буҷети шаҳр ҷудогардида, барои эҳтиёҷоти сохторҳои коммуналии ноҳияҳои пойтахт баҳри дар ҳолати хуби санитарию экологӣ нигоҳ доштани пойтахт харидорӣ карда шуданд.                    Бояд тазаккур дод, ки тибқи амалисозии лоиҳаи Идоракунии партовҳои сахти маишӣ ҳамчун компоненти муҳими лоиҳа, ки аз ҷониби Бонки аврупоии таҷдид ва рушд маблағгузорӣ мешавад харидории теъдоди зиёди техникаҳои коммуналӣ ва қуттиҳои партовҷамъкунӣ низ пешбинӣ гардидаанд.