КОРҲОИ ОБОДОНӢ ДАР КӮЛОБ

                     Кӯлоб, 16 январ. (АМИТ «Ховар», Сулаймон Холов).-Корхонаи фаръии давлатии шаҳри Кӯлоб дар давоми соли сипаригашта ба ташкилоти буҷетию ғайрибуҷетӣ ба маблағи 812,6 ҳазор сомонӣ хизмати коммуналӣ расонидааст, ки ин шумора нисбати соли гузашта 78,4 ҳазор сомонӣ зиёд аст,- гуфт директори корхона Тағоймурод Ҷумъаев. Ӯ афзуд, ки бо ин мақсад корхонаи мазкур ба 215 ташкилоту муассисаҳои давлати ва ғайридавлатӣ шартнома дошта, мувофиқи шартнома амал намуда истодаанд. Ба гуфтаи ин манбаъ дар тӯли як соли сипаригардида ба миқдори 36 200 метри мукааб партобҳо кашонида шуда, бо маблағгузории ҳукумати шаҳр дар маҳаллаҳои Ш. Шоҳин, Х. Шерозӣ, Борбад ва хиёбони Исмоили Сомонӣ 50 қуттиҳои оҳанин гузошта шудааст. Аз тарафи корхона 7 ҷои кори таъсис дода шуда, 5 нафарашонро занҳо ташкил медиҳанд. Мавриди зикр аст, ки роҳбарияти корхона ва кормандони он муроҷиатномаи сарвари давлатро ҳамаҷониба дастгирӣ намуда, ба маблағи 25 300 сомонӣ саҳмияҳои НОБ- и Роғунро харидорӣ намуданд.