МУЛОҚОТИ Ҳ.ЗАРИФӢ БО САФИРИ ИМА

                 Душанбе, 21 январ. (АМИТ «Ховар», Наргис Бояхмедова). — Вазири корҳои хориҷии Ҷумҳурии Тоҷикистон Ҳамрохон Зарифӣ дирӯз бо сафири ИМА дар Тоҷикистон Кеннет Гросс мулоқот кард. Зимни мулоқот маҷмӯи масъалаҳои марбут ба муносибатҳо ва ҳамкории дуҷониба, аз ҷумла масъалаҳои гузаронидани машварати сиёсӣ бо иштироки намояндагони Тоҷикистон ва ИМА баррасӣ шуданд. Тибқи нақша машварати сиёсии намояндагони Тоҷикистону ИМА рӯзҳои 8 – 9 феврали соли 2010 дар Вашингтон баргузор мегардад.                  Ҳ.Зарифӣ изҳор намуд, ки ҳар ду мамлакат барои рушди муносибатҳои дуҷониба имкониятҳои зиёд доранд ва мо бояд онҳоро бо кӯмаки ҳамдигар амалӣ созем. Дипломати амрикоӣ изҳор намуд, ки машварати сиёсии оянда барои баррасии масъалаҳои ҳамкории ҳар ду кишвар шароит муҳайё месозад.                   Мусоҳибон таъкид карданд, ки ҳамкории сиёсию иқтисодии мамлакатҳои Осиёи Марказӣ, иҷрои барномаҳои обу энергетика ва нақлиётӣ ва вазъияти Афғонистон самтҳои асосии ҳамкории Тоҷикистону Амрикоро ташкил медиҳанд.                   Ҳ.Зарифӣ қайд кард, ки амалӣ сохтани чунин барномаҳо, аз ҷумла сохтмони роҳҳои оҳан ва мошингард дар байни Тоҷикистону Афғонистон, нерӯгоҳҳои барқӣ ва хатҳои интиқоли барқ аз Тоҷикистон ба Покистон аҳамияти минтақавӣ дошта, пеш аз ҳама ба манфиати иқтисодиёти Афғонистон мебошанд.