ОМОДАГӢ БА ҶАШНИ ВАҲДАТ ДАР ВМКБ

                  Хоруғ, 23 январ. (АМИТ «Ховар», Лутфишои Додо). — Раиси вилоят Қодири Қосим бо ҷараёни корҳо дар бунёди шифохонаи Гармчашмаи ноҳияи Ишкошим шинос гардида, аз фаъолияти сохтмончиён изҳори қаноатмандӣ намуд.                    Ҳангоми дидан аз сохтмони иншоотҳои ҷашнӣ: чойхонаи миллӣ, Литсейи Президентӣ барои кӯдакони лаёқатманд, хобгоҳ барои донишҷӯёни Донишгоҳи давлатии шаҳри Хоруғ, Маркази ҷавонон, варзишгоҳи марказӣ, театри вилоятӣ, студияи телевизионии Бадахшон Раиси вилоят диққати масъулонро ба сифати сохтмони иншоотҳо, таъмини онҳо бо қувваи корӣ ва масолеҳи бинокорӣ ҷалб кард.                    «Муҳити табии Бадахшон метавонад ба ҷараёни кор таъсири худро расонад. Аз ин лиҳоз тамоми чораҳоро бояд андешид, ки ҳамаи иншоот то ҷашни умумиҷумҳуриявии Ваҳдат дар шаҳру навоҳии вилоят мавриди баҳрабардорӣ қарор дода шаванд», — таъкид кард раиси вилоят Қодири Қосим.