ТӮҲФАҲОИ ИДОНА БА БАЧАГОНИ МАЪЮБ

                  Бобоҷон Ғафуров, 4 января. (АМИТ «Ховар», Санавбар Мақсудова). — Муассисаи воҳиди давлатии «Майдони ҳавоии байналхалқии Хуҷанд» дар рӯзҳои иди Соли нав ба тарбиягирандагони мактаб — интернати махсуси бачагони ношунаво кӯмаки хайрия расонд. Ба онҳо ба маблағи қариб 3,5 ҳазор сомонӣ тӯҳфаҳои идона пешниҳод карда шуд. Ҷамъияти карҳо ва гунгҳои вилоят ба тарбиягирандагони мактаб – интернати мазкур сад ҷилд китоби «Сӯҳбат бо имову ишора» — ро тӯҳфа кард. 100 нафар тарбиягирандагони мактаб – интернат дар Кохи Рӯдакӣ дар барномаи солинавӣ ширкат варзиданд.                    Роҳбарияти корхонаи муштараки «Хуҷанд – Инвесткотон» бо ин мақсад зиёда аз 1000 сомонӣ ҷудо кард.                   Директори мактаб – интернати мазкур Дилбар Бобоҷонова зикр намуд, ки мактаб – интернат соли 1975 дар ҳудуди ҷамоати Қистакӯзи ноҳияи Бобоҷон Ғафуров таъсис ёфта буд ва имрӯз дар он 217 нафар бачагони аз 7 то 18 — сола тарбия карда мешаванд.