АЗ БЕЭҲТИЁТӢ «ГАЗЕЛ» СӮХТ

Душанбе, 10 феврал. (АМИТ «Ховар», Жасмин Назарова). – Дар шоҳроҳи Хуҷанд – Конибодоми вилояти Суғд, ҳудуди ҷамоати Лоҳутӣ дар автомашинаи шахсии тамғаи «Газел» рақами давлатиаш АЕ 46 62 РТ 02 сӯхтор ба амал омад. Автомашинаи мазкур ба Абдуюсуф Абдуллоеви 45 сола, истиқоматкунандаи ноҳияи Б. Ғафуров тааллуқ дорад. Тибқи иттилои корманди маркази матбуоти Сарраёсати хадамоти давлатии оташнишонии ВКД ҶТ Толиб Ҳаётов, сӯхтор дар масоҳати 10 метри мураббаъ паҳн шуда автомашинаро корношоям гардонд. Сабаби ба амал омадани сӯхтор расиши кӯтоҳи ноқилҳои барқии автомашинаи мазкур мебошад. Зарар аз сӯхтор 10 ҳазор сомониро ташкил медиҳад. Гунаҳкор ронандаи автомашина мебошад.