ЗАМИНРО ФУРӮХТА ХУДРО БА МАҲБАС МЕЗАНАД

Душанбе, 5 феврал. (АМИТ «Ховар», Лаззат Диловарзод).- Фактҳо шоҳиди ҳоланд, ки замин чун манбаи даромад аз тарафи баъзе роҳбарони шаҳру навоҳӣ  ба корафтодагон хариду фурӯш карда мешавад.      Дар аризае, ки  аз номи шаҳрванд «Ф» ба Сарраёсати Агентии назорати давлатии молиявӣ ва мубориза бо коррупсия ворид шудааст, гуфта мешавад,  ки раиси ҷамоати деҳоти «Ҳилолӣ» — и ноҳияи Хуросон Аҳлиддин Сафаров барои ҷудо намудани қитъаи замини наздиҳавлигӣ ба андозаи 0,7 га ва ба расмият даровардани ҳуҷҷатҳо аз ӯ бо роҳи тамаъҷӯӣ ба ҳайси пора 1500 доллари амрикоӣ талаб кардааст. Дар натиҷаи гузаронидани корҳои фаврӣ — ҷустуҷӯӣ рӯзи 5 – уми январи соли 2010  шаҳрванд А. Сафаров ҳангоми гирифтани пора  ба маблағи 1400 доллари амрикоӣ  аз тарафи кормандони Сарраёсати Агентӣ дастгир карда шуд. Аз ин пештар – 21 уми декабри соли 2009 А. Сафаров аз шаҳрванд «Ф» 100 доллари амрикоӣ пешмузд гирифтааст. Нисбати А. Сафаров Раёсати тафтишотии Агентӣ бо моддаи 319 қ.3 (гирифтани пора) – и КҶҶТ парвандаи ҷиноӣ оғоз гардидааст.