ҲАЛОКАТИ ШАҲРВАНДОНИ ТОҶИКИСТОН ДАР МАСКАВ

Душанбе,  30 март. (АМИТ «Ховар», Фарангис  Раҳимова). —  Дафтари  матбуоти  Сафоратхонаи  Ҷумҳурии  Тоҷикистон  дар  Федератсияи  Русия  хабар  медиҳад, ки  29  марти  соли  2010  дар  натиҷаи  амалиёти террористӣ  дар   истгоҳҳои «Лубянка» ва  «Парк културы» — и  метрои  Маскав  се  шаҳрванди  Тоҷикистон ба  ҳалокат  расид.  Онҳо  Абдураҳмонов  Умед  Ҳусейнович, соли таваллудаш  1986,  сокини  ноҳияи  Вахш, Қаршиев  Нодирбек  Очилдиевич, соли  таваллудаш 1986 ва Эшназаров Исломҷон  Камолович,  соли таваллудаш  1985 ҳар  ду  сокинони   ноҳияи  Турсунзода мебошанд. Дар натиҷаи таркиш   шаҳрванди  Тоҷикистон  Ориё  Ёсинович  Назаров  — сокини  шаҳри  Душанбе низ маҷрӯҳ  шуд. Ӯ  айни  ҳол  дар  шифохонаи  ёрии таъҷилии  тиббии  ба  номи  Склифосовский  табобат  карда  мешавад. Вазъи  саломатии   мавсуф  хуб аст ва  ӯро  рӯзҳои  наздик  ҷавоб  медиҳанд,  гуфта  мешавад дар  хабари  сафоратхона.  Кормандони  шӯъбаи  муҳоҷирати  сафоратхона ҷустуҷӯи шаҳрвандони  Тоҷикистонро  дар  байни  шахсони  ҳалоку  маҷрӯҳшуда  давом  медиҳанд. Аз  дафтари  матбуоти  Вазорати  корҳои  хориҷии  Ҷумҳурии  Тоҷикистон  ба  АМИТ «Ховар»  хабар  доданд, ки   кормандони вазорат ва  Сафоратхонаи Тоҷикистон  дар  Маскав барои  ҳалли  масъалаҳои  ба  ватан  фиристодани  ҷасади  шахсони   ҳалокшуда  ҳамаи  тадбирҳоро  меандешанд. Инчунин   хабар   дода  мешавад, ки  мақомоти  Русия  ба  аҳли оилаҳои  шахсони  ҳалокшуда  ба  маблағи  1  миллион  рубли  Русия  ва  ба  шахсони  маҷрӯҳгардида  ба  маблағи  460  ҳазор  рубли  Русия  кӯмак  мерасонанд. Русия  инчунин   тамоми  хароҷоти  вобаста ба  фиристодани  ҷасадҳоро  ба  зиммаи  худ  мегирад.