АКНУН ТО ХУҶАНД БЕПУЛ РАФТА НАМЕТАВОНЕМ

Душанбе,  31 март. (АМИТ «Ховар», Кристина Эрлих). — Имрӯз  дар  километри  10 – уми  роҳи  мошингарди Душанбе – Хуҷанд  баъди  посгоҳи  «Чорбоғ»  маросими  ифтитоҳи  роҳи  пулакии  мошингарди «Душанбе – Хуҷанд — Бӯстон – Чаноқ»  баргузор  мегардад.  Дар ин бора  сардори  Раёсати  умумии  сохтмони  роҳҳои  вазорати нақлиёт  ва  Алоуддин  Аноятшоев  ба  АМИТ «Ховар»  хабар  дод. Дар  маросими  ифтитоҳи  роҳи  пулакӣ  вазири  нақлиёт  ва  алоқа  Олимҷон  Бобоев,   намояндагони  ташкилоту  идораҳои  дигари  дахлдор  ва  ташкилотҳои  роҳсозии  хориҷӣ  ширкат  меварзанд. Роҳи  мошингарди «Душанбе – Хуҷанд — Бӯстон – Чаноқ»   дар  доираи  барномаи  тармиму  таҷдиди  роҳҳои  мошингарди  мамлакат  аз нав  барқарор  карда  шуд. Маблағи  умумии  тармими  роҳи  мазкур  295   миллиону  900  ҳазор  доллари  ИМА – ро ташкил  дод.  Аз  ин  маблағ  281  миллиону  100  ҳазор  долларро  Бонки  содироту  воридоти  Чин  ва 14 миллиону  800  ҳазор  долларрро  Ҳукумати  Тоҷикистон   ҷудо  намуданд. Мухбири  АМИТ «Ховар»  хабар  медиҳад, ки  акнун ҳар  ронанда  мувофиқи  навъи  нақлиёт  барои  интиқоли  молу  мусофирон  то  шаҳри  Хуҷанд  ва  сарҳади  Ӯзбекистон  маблағи  муайян   мепардозад.