КӮМАКҲОИ АНЪАНАВИИ НАВРӮЗӢ

Душанбе, 4 март. (АМИТ «Ховар», Лаззат Диловарзод).- Соли ҷорӣ таҷлили Наврӯзи хуҷастапай бо шукӯҳу шаҳомати хоса баргузор мегардад. -Бо дастуру ҳидоятҳои  Сарвари давлат дар ҷашни Наврӯзӣ расонидани кӯмак ба эҳтиёҷмандон, аз ҷумла ятимону бепарасторон, маъюбону пирони барҷомонда, ҳамчунин оилаҳои камбизоат бояд ба эҳёи расму оини судбахши Наврӯзӣ табдил ёбад,- иброз дошт раиси шаҳри Ваҳдат – узви Маҷлиси миллӣ Анвари Вайсиддин ба мухбири АМИТ «Ховар». Дар шаҳри Ваҳдат рӯзҳои ҷашни Наврӯзӣ бо кӯмаки саховатмандон ва соҳибкорони маҳаллӣ  гузаронидани хатнасури ятимон, баргузории тӯи навхонадорони бепарастор ва фарзандони оилаҳои камбизоат ба нақша гирифта шудааст. Чанд соли охир ин анъанаҳои неки Наврӯзӣ ба расму оини мардумӣ  ворид гардид ва минбаъд  он чун расму оини мардумӣ ба ҳукми анъанаҳои таърихӣ дохил хоҳанд шуд.