СЕМИНАРИ ҶУМҲУРИЯВӢ ДАР НОҲИЯИ ВАХШ

Қӯрғонтеппа,  30 март. (АМИТ «Ховар», Мурод  Сотиев). —   Бо ташаббуси Вазорати  кишоварзии  мамлакат  дар  ноҳияи  Вахш барои   муҳокимаи   тадбирҳои  мубориза ба  муқобили  малах ва ҳашароти  зараррасони  пахта семинари  ҷумҳуриявӣ  баргузор  гардид.  Дар ташкили  семинар  мақомоти  иҷроияи  ҳокимияти  давлатии  вилояти  Хатлон  ва Маркази  ҷумҳуриявии  пешгирии  паҳн  гардидани  малах  низ  саҳм  гузоштанд. Дар  семинар   зикр  шуд, ки  имсол   паҳн  гардидани  малах  дар  ноҳияи  Вахш эҳтимоли  қавӣ  дорад. Аз  рӯи  маълумоти  мутахассисон,  соли  гузашта  дар  ин  ноҳия  ва  ноҳияҳои  дигари  вилояти  Хатлон  малах ва  ҳашароти  дигари зараррасон  паҳн  гардида буд. Соли гузашта барои  несту нобуд  сохтани  малах  дар  15  ноҳияи  вилоят  бештар  аз 400 нафар  сафарбар  карда, қариб 14  ҳазор  литр   доруҳои  химиявӣ   сарф  карда шуд.