ҚАРЗИ ИСТИФОДАБАРАНДАГОНИ ОБ МЕАФЗОЯД

Қӯрғонтеппа,  29 апрел. (АМИТ «Ховар», Мурод  Сотиев). —  Дар  вилояти  Хатлон  қарзи  истифодабарндагони об  торафт  зиёд  мегардад. Маблағи  қарзи  истифодаи  об  дар  вилоят  то 1  январи соли равон  71  миллиону 756  ҳазор  сомониро  ташкил  дод.  Дар  давоми  семоҳаи  аввали  сол   аз ин  маблағ 1 миллиону 756  ҳазор  сомонӣ  пардохта  шуду  халос. Пардохти  қарзи оби  истифодашуда дар   ноҳияҳои  Ҷилликӯл,  Ёвон, Ҷомӣ,  Бохтар  ва  Румӣ  ниҳоят  суст  ба  роҳ  монда шудааст. Сардори  раёсати  хоҷагии оби  вилоят  Мирзо  Собиров  ба  мухбири  АМИТ «Ховар»  гуфт, ки  дар  ҳудуди  вилоят  88  иттиҳодияи  истифодабарнадагони  об  фаъолият  дорад. Онҳо  масоҳати 122  ҳазору  702  гектар  заминро  бо  об  таъмин  менамоянд.  Фаъолияти  иттиҳодияҳои  истифодабарандагони оби ноҳияҳои  Панҷ,  Вахш ва  Бохтар  самарабахш  ва  фоидаовар  мебошад. Вале  фаъолияти  чунин  иттиҳодияҳо  дар  ноҳияҳои  Носири  Хусрав,  Ҷилликӯл,  Хуросон,  Ёвон  ва  Қабодиён  ба талабот  ҷавоб  намедиҳад.  Айни  ҳол  дар  минтақаи  Қӯрғонтеппа  аз 63  иттиҳодияи  истифодабарнадагони  об  17  иттиҳодия бо  сабаби  надоштани  маблағ  кор  намекунад.