БАРОИ ИНФРАСТРУКТУРАИ ДЕҲОТ

Душанбе, 23 апрел. (АМИТ «Ховар», Лаззат Диловарзод).- Корхонаи воҳиди давлатии «Хоҷагии манзилию коммуналӣ» дар ҳамкорӣ бо Бонки Ҷаҳонӣ дар 8 шаҳру маркази ноҳияҳои ҷумҳурӣ лоиҳаи рушди инфраструктураи маҳаллӣ (коммуналӣ) дар Ҷумҳурии Тоҷикистонро амалӣ менамояд,- иброз доштанд дар «Хоҷагии манзилию коммуналӣ» -и шаҳри Душанбе ба мухбири АМИТ «Ховар». Дар марҳилаи сеюми лоиҳа, дар семоҳаи аввали соли ҷорӣ бинобар гузаронида нашудани тендери пудратчиён,  корҳои барқарорсозии системаҳо оғоз карда нашудааст. Корхонаи воҳиди давлатии «Хоҷагии манзилию коммуналӣ» бо мақсади ҷалби сармоягузорони хориҷӣ, ташкилотҳои байналмилалии молиявӣ ва ватанӣ баҳри татбиқи барнома  лоиҳаҳои инвеститсионӣ таҳия намуда, ба ташкилотҳои марбута пешниҳод намуд. Аз ҷумла, лоиҳаи барқарорсозии системаҳои обтаъминкунӣ ва канализатсияи шаҳру ноҳияҳои Қӯрғонтеппа, Кӯлоб ва Данғара аз ҷониби Бонки Аврупоии Таҷдид  ва Рушд 6, 173 млн. доллари амрикоӣ ҷудо карда шудааст.