ДАРАХТИ ДӮСТӢ БИНШОН…

Душанбе,  1  апрел. (АМИТ «Ховар»,  Фарангис  Раҳимова). —  Кормандони  Сафоратхонаи  Ӯзбекистон  дар  Тоҷикистон таҳти роҳбарии  Шоқосим  Шоисломов  ва  дипломатҳои  Сафоратхонаи  Покистон  дар  Тоҷикистон  таҳти роҳбарии  сафир Холид Усмон  Қайсар  30  март  дар  Боғи  набототи Тоҷикистон ниҳолҳои  дарахтони  аз  мамлакатҳояшон  овардашударо  шинонданд. Аз  ҷумла,  кормандони  сафоратхонаи  Ӯзбекистон  дар  Боғи  наботот ҳашар  ташкил  намуда,  бештар  аз 50  ниҳоли   дарахтони  арча, сарв  ва  бурсро   шинонданд, ки  аз  гармхонаи  шаҳри  Деҳнав  оварда шуда буданд. Рӯзҳои  наздик   кормандони  сафоратхонаҳои  Ҳиндустон,  Туркманистон ва  Қирғизистон низ  дар  Боғи  наботот ҳашар  баргузор  месозанд. Мухбири  АМИТ «Ховар»  ёдовар  мешавад, ки  Президенти  Ҷумҳурии Тоҷикистон Эмомалӣ  Раҳмон  6  ноябри  соли  гузашта  зимни  таҷлили  солгарди  навбатии  Рӯзи Қонуни асосии  Ҷумҳурии  Тоҷикистон  дар  Боғи  наботот намояндагони  сафоратхонаҳои  хориҷӣ  ва  созмонҳои байналхалқиро даъват  карда буд, ки   дар  Боғи  миллии  наботот гӯшаи  интернатсионалӣ  бунёд  намуда,  дар он   ниҳоли  дарахтони  аз  мамлакатҳояшон  овардашударо  шинонанд. Ҳамон  вақт  намояндагони  муассисаҳои  дипломатии  мамлакатҳои  хориҷӣ  ин пешниҳодро  якдилона  маъқул  дониста  буданд. Гӯшаи  байналхалқии  Боғи  наботот  рамзи  дӯстии  халқҳо  ва  эҳтироми  Тоҷикистон  ҳамчун  давлати  мустақилу  соҳибихтиёр  хоҳад  гашт.