ХАРҶИ НОҶОЙ — НИШОНИ ФАРҲАНГИ ПАСТ

Хоруғ, 24 апрел. (АМИТ «Ховар», Л. Додо). –Роҷеъ ба риояи Қонуни ҶТ  «Дар бораи танзими анъана ва ҷашну маросимҳо дар Ҷумҳурии Тоҷикистон» муовини раиси ВМКБ Арамбегим Маҳтобшоева ва мудири бахши танзиму анъанаи назди мақомоти иҷроияи ҳокимияти давлатии вилоят Хусрав Рақамов бо сокинони деҳаи Баҳррўшони ноҳияи Рўшон мулоқот намуданд. Зимни мулоқот қайд  гардид, ки мақсади тавлиди ин Қонун пешгирӣ кардани хароҷоти зиёдативу пешбурди рўзгори мардум аст. Сокинон ин иқдомро дастгирӣ карда, гуфтанд, нафароне ҳастанд, ки сарватманд буданашонро нишон доданӣ шуда, баъзан харҷҳои ноҷой мекунанд, ҳол он ки, харҷи беҳуда маънои сарватмандиро надорад, балки фарҳанги паст доштани шахсро собит мекунад. Иштирокдорони мулоқот ба хулоса омаданд, ки минбаъд назоратро на танҳо кормандони бахши танзиму анъана, инчунин худи мардум низ ба зимма мегиранд.