ТАДБИРҲОИ САРФАИ ҚУВВАИ БАРҚ ДАР ПОКИСТОН

Вақтҳои охир  дар  саросари   Покистон  бо  сабаби  нарасидани қувваи барқ вазъияти  муташанниҷ  ба  амал  омадааст. Бинобар ин  Ҳукумати  мамлакат барои  истифодаи  сарфакоронаи  он  тадбирҳои  қатъӣ  меандешад.  Ҳадафи  ин   тадбирҳо  истифодаи  сарфакорона  ва   то ҳадди  имкон  кам  кардани  зарари  нарасидани  қувваи барқ  аст. Сарвазири  мамлакат  Юсуф Ризо  Гелонӣ  изҳор  намуд, ки  айни  ҳол  нарасидани  қувваи барқ  ва  қатъ  намудани  интиқоли он  дар  бисёр   минтақаҳои  мамлакат  ба   проблемаи  амнияти  миллӣ табдил  ёфтааст. Тадбирҳои  андешидаи  Ҳукумат аз  ҷумла,  ҷорӣ  намудани  ҳафтаи  кории  панҷрӯза,  манъ  намудани  кори  мағозаю  дӯконҳо  баъди ғуруби  офтоб,  кӯтоҳ  кардани мӯҳлати гузаронидани тӯйю  маъракаҳо ва   манъи истифодаи қувваи  барқро барои равшан кардани  лавҳаҳои рекламавӣ  дар бар  мегиранд.