ДАР ОЗМУН ДАРХОСТҲОИ БОНКҲО ДАСТГИРИ НАШУД

Душанбе 28 май. (АМИТ «Ховар», Покиза Маҳмадбекова). — 27 майи соли равон дар Вазорати молияи ҷумҳурӣ оиди чойгир намудани маблағҳои аз фурӯши саҳмияҳо ва сертификатҳои саҳмияҳои НОБ-и Роғун ба дастомада ва ҷойгир намудани онҳо дар депозитҳои бонкҳои ҷумҳурӣ озмун баргузор гардид. Тавре ба мухбири АМИТ «Ховар» котиби матбуотӣ Вазорати молияи ҷумҳурӣ Момагул Шодиева иттилоъ дод, «дар озмун аъзоёни комиссия дар хайати кормандони масъули Вазорати молияи ҷумҳурӣ, Бонки миллии Тоҷикистон, ҶСК «НБО Роғун» ва Шӯрои ҷамъияти оид ба назорати харҷи маблағи аз фурӯши саҳмияҳои ҶСК «НБО Роғун» иштирок намуданд. Ба озмун дархостҳо аз ҷониби ҶСК «Агроинвестбонк», ҶСК «Тоҷиксодиротбонк» ва ҶСК «Бонки Эсхата» қабул карда шуданд». Дар натиҷаи баррасии дархостхои пешниходгардидаи бонкҳои номбаршуда муайян гардид, ки фоизи миёнавазни депозитҳои дархостшуда ба андозаи 6 фоизи солона баробар мебошад. Бо дарназардошти паст будани меъёри фоизи пешниҳодгардида, аз тарафи бонкхои номбурда, аз ҷониби аъзоёни Комиссияи озмун дархостҳои бонкҳои мазкур дастгири нашуд.