ХАБАРИ ВАЗОРАТИ КОРҲОИ ХОРИҶИИ РУСИЯ

Душанбе,  8 май. (АМИТ «Ховар»). —  Вазорати  корҳои  хориҷии  Русия  хабар  медиҳад, ки  8  май  дар  Маскав  ба  муносибати  65 – солагии  Ғалабаи  халқҳои  Шӯравӣ  бар  фашизм  дар   Ҷанги  Бузурги  Ватанӣ  мулоқоти  ғайрирасмии  сарони  давлатҳои  ИДМ  баргузор  мегардад.  Дар  он  президентҳои баъзе  мамлакатҳои  ИДМ  ширкат  меварзанд.  Дар  хабар  гуфта  мешавад, ки   дар тадбирҳои  тантанавии  бахшида ба   иди  Ғалаба  дар  пойтахти  Русия  теъдоди  зиёди роҳбарони  давлатҳои  хориҷӣ  ва  созмонҳои байналхалқӣ  ширкат  хоҳанд  варзид. Аз  ҷумла,  дар  ин  ҷамъомадҳо  роҳбарони  30  давлати  хориҷӣ  ва  созмонҳои  байналхалқӣ,  аз ҷумла,   сарони  давлатҳои  ИДМ,  Булғористон,  Ветнам,  Исроил,  Латвия,  Македония,  Муғулистон, Лаҳистон,  Сербия, Словакия, Словения, Фаронса, Хорватия,  Черногория, Чехия, Эстония, сарони  ҳукуматҳои  Олмон,  Италия ва  раиси  Ҷумҳурии  Мардумии  Чин  иштирок  хоҳанд  кард. Дар  байни   меҳмонони  олиқадр  раиси  Кумитаи  иҷроияи  ИДМ,  Муншии  умумии СААД ва  Муншии  умумии Шӯрои  Аврупо  ҳастанд. Барномаи  тадбирҳои расмии  идона  расми гузашти  низомиро  дар  Майдони  сурх, гузоштани  гулчанбарҳо  аз  ҷониби  ҳайатҳои  хориҷӣ  дар  назди  Қабри   аскари  номаълум,   зиёфати  идона  дар  Қасри  калони  Кремл  ва  ғайраро  дар  бар  мегирад. Ба  расми  гузашти низомӣ  дар  Майдони  сурх   сарони  147   намояндагии  дипломатии  хориҷӣ  даъват  карда шудааст.