ОФАТИ ТАБИӢ ХУЧАНДИЁНРО ҲУШДОР ДОД

Душанбе, 27 май. (АМИТ «Ховар», Бекназари Абӯбакр). — Субҳи рӯзи 26 май дар қисмати шимоли мамлакат, аз ҷумла дар шаҳри Хуҷанд  пайваста бо бориши борони тез шамоли шадид вазид, ки тибқи иттилои Ситоди шаҳрии ҳолатҳои фавқулодда ва мудофиаи гражданӣ суръаташ дар ҳар сония 19 — 20 метрро ташкил дод. Бар асари он шаҳри Хуҷанд ҳисороти ҷиддӣ дид. Аз мақомоти иҷроияи ҳокимияти давлатии шаҳри Хуҷанд ба АМИТ «Ховар» иттилоъ доданд, ки cитоди шаҳрии бартарафкунии оқибати офати табиӣ тамоми имконият ва воситаҳои техникии муассисаҳои хизматрасон ва сохторҳои дахлдор, аз ҷумла  ситоди ҳолатҳои фавқулодда ва мудофиаи граждании шаҳрро барои аз дарахтони решаканшуда, шохаҳои шикаста, тахтаҳои рекламавии кандашуда, тоза кардани роҳу кӯчаҳо ва пиёдароҳу пайраҳаҳо, таъмини ҳаракати бемамонияти воситаҳои нақлиёт, дар  муассисаҳои дигар бошанд, барои ғундоштани шиферу шишаҳои шикаста ва умуман ба ҳолати муқаррарӣ овардани саросари шаҳр, равона кард. То нимаи дуюми рӯз ин корҳо пурра ба анҷом расонида шуданд. Алҳол мақомоти иҷроияи ҳокимияти давлатии шаҳр барои дар мӯҳлатҳои кӯтоҳтарин бартараф кардани ҳисороти бар асари шамоли сахт расида тадбирҳои мушаххасро амалӣ мегардонад.