ОМӮЗИШИ ХАРГӮШПАРВАРӢ

Душанбе, 28 май. (АМИТ «Ховар», Дилшодаи Ҷонмард).- Бо назардошти тараққӣ додани соҳаи харгӯшпарварӣ ва ҳалли масъалаи амнияти озуқаворӣ аз тарафи Ассосиатсияи Миллии ташкилотҳои машваратии «АгроДониш» бо дастгирии Вазорати кишоварзии Ҷумҳурии Тоҷикистон ва ташкилоти башардӯстонаи ОКСФАМ Новиби Ҳолланд рӯзи 27.05.2010 дар корхонаи харгӯшпарварии ҶДММ «Домулло» семинарии омӯзишӣ оид ба парвариши харгӯшон гузаронида шуд. Дар он мушовирон, мутахассисон ва фермерони харгӯшпарвар аз вилоятҳои Суғду Хатлон, ноҳияҳои тобеи Ҷумҳурӣ  иштирок варзида, бахри вусъат додани ин соҳа, зиёд намудани саршумори зотҳои самти гӯштӣ, гӯшту-пӯстӣ, истифода намудани таҷрибаи пешқадами усули акселеративии Михайлов И.Н., мубодилаи афкор намуданд. Ба ҳамаи иштирокчиён рисолаи нави «Дастур оид ба парвариши харгӯш», ки аз тарафи Ассотсиатсия Миллии сохторҳои машваратии «АгроДониш» ба чоп расидааст, ба тариқи ройгон дастрас гардид.