3 ТОННА БИРИНҶИ ИСТЕҲСОЛИ ЧИН БА СТАНДАРТИ ИСТЕЪМОЛӢ ҶАВОБГӮ НАБУД

Душанбе, 30 июн. (АМИТ «Ховар», Покиза Маҳмадбекова). – Кормандони «Тоҷикстандарт» 3 тонна биринҷи истеҳсоли Ҷумҳурии Халқии Хитойро барои ҷавобгӯ набудан ба талаботи стандартҳои истеъмолӣ нобуд карданд. Ба мухбири АМИТ «Ховар» аз маркази матбуотии Агентии «Тоҷикстандарт» иттилоъ доданд, ки директори ҷамъияти саҳҳомии шакли кушодаи «Офтобпараст» шаҳрванди хитой Ҷав ли Мин ба Агентии «Тоҷикстандарт» муроҷиат кардааст, ки сифати маҳсулоти ӯро аз ташхис гузаронанд. Дар вақти санҷиш маълум гашта, ки дар натиҷаи чакидани борон дар анбор 3 тонна биринҷи хитоӣ вайрон шудааст. Баъди тартиб додани санад   3 тонна биринҷ дар ҳузури кормандони «Тоҷикстандарт», Кумитаи амнияти миллӣ, Кумитаи ҳифзи табиати шаҳри Душанбе нест карда шуд.