БАРОИ ПЕШГИРИИ БЕМОРИҲОИ ХАВФНОК

Хоруғ,  18 июн. (АМИТ «Ховар», Л.Додо). —  Имрӯзҳо  дар  саросари   Вилояти  Мухтори  Кӯҳистони  Бадахшон  даври  чоруми   дорудиҳӣ  ба бачагон  барои  пешгирии  бемории   фалаҷи  ҳароммағз  давом  дорад.  Дар  ин  давра  ба  8  ҳазору  292   нафар   кӯдакон  ва  наврасон  дору  дода  мешавад. Бояд  гуфт, ки  то  имрӯз  дар  ҳудуди  вилоят   ягон  нафар  бемори   гирифтори   фалаҷи  ҳароммағз  ба  қайд  гирифта  нашудааст. Бо  вуҷуди  ин   кормандони  соҳаи  тиб   барои  пешгирии   беморӣ  тадбирҳои  мушаххас  меандешанд. Инчунин  кормандони  маркази табобати   бемориҳои  сил ва табларзаи   вилоят  барои   ошкор  сохтани  бемории  сид  дар  байни  аҳолӣ  маъракаи  навбатии эмкуниро   пеш  гирифтанд. Директори  марказ  Маҳзур  Меҳтаршоев  зикр  кард, ки аз  аввали  моҳи  июн  эмкунии  бачагони  то  14 – сола  гузаронида  мешавад. Мавсуф  афзуд, ки  дар  давоми  15 – соли  гузашта барои ошкор  намудани  беморони  сил дар  вилоят  ягон  тадбир  андешида  нашуда буд.  Маъракаи  имсола  бо  дастгирии  вазорати тандурустӣ  гузаронида  мешавад. Ин  маърака имкон  медиҳад, ки  сатҳи паҳн  гардидани  беморӣ  дар  байни  мардум  аниқ  муайян  карда  шавад,  гуфт  М.Меҳтаршоев.