РАИСИ БОНКИ МИЛЛИИ ТОҶИКИСТОН ВА МУОВИНОНАШ АЗ НАВ ДАР ВАЗИФААШОН ТАСДИҚ ГАШТАНД

Душанбе, 30 июн.(АМИТ «Ховар», Марзия Саидова).-Дар ҷаласаи навбатии иҷлосияи якуми палатаи поёнии парлумони Тоҷикистон, ки 30 июн таҳти раёсати Раиси Маҷлиси намояндагони Маҷлиси Олии ҷумҳурӣ Шукурҷон Зуҳуров доир шуд,  дар асоси Фармони Президенти Ҷумҳурии Тоҷикистон Эмомалӣ Раҳмон,  Раиси Бонки миллии Тоҷикистон Шариф Раҳимзода, муовинонаш Юсуфиён Ҷамшед, Малоҳат Холиқзода ва Тӯрақул Ҳақназаров аз вазифаашон озод карда шуда, дубора ба вазифаҳояшон таъин гардиданд. Зимни шарҳи Фармони Президенти мамлакат намояндаи комилҳуқуқи Президенти Ҷумҳурии Тоҷикистон дар Маҷлиси Олии Ҷумҳурии Тоҷикистон  Ҷумъахон Давлатов гуфт, ки мақсад аз озод ва дубора ба вазифаҳояшон тасдиқ кардани Раиси Бонки миллӣ ва муовинони ӯ,  ин  ворид намудани тағйирот ба Қонуни Ҷумҳурии Точикистон «Дар бораи Бонки миллӣ» мебошад.