ҶАМЪБАСТИ ФАОЛИЯТИ ШАШМОҲАИ ФУРУДГОҲ

Душанбе, 15 июл. (АМИТ «Ховар», Лаззат Диловарзод).- Корхонаи воҳиди давлатии «Фурудгоҳи байналмилалии Душанбе» шашмоҳаи аввали фаъолияташро  дар соли ҷорӣ ҷамъбаст намуд. Муовини директори генералии корхонаи мазкур Азиз Иброҳимов дар бораи фаъолияти шашмоҳаи корхона мухтасар   маълумот дода,  иброз дошт, ки  корхона дар  ин муддат тавонист вазъи иқтисодии худро устувор нигоҳ дорад. Зимнан амнияти мусофирон дар тамоми хатҳои парвоз хуб таъмин карда шудааст. Бино ба гуфти А.Иброҳимов, фурудгоҳ бо 19 ширкати ҳавопаймоии дохил ва хориҷи кишвар ҳамкорӣ дорад. Дар давраи ҳисоботӣ ба   487 ҳазору 513 нафар мусофирон хизмат расонида шудааст, ки аз он ба буҷаи ҷумҳурӣ 21, 3 млн. сомонӣ маблағ ворид гардидааст. Мудири шӯъбаи нақлиёт ва коммуникатсияи Дастгоҳи иҷроияи Президенти ҶТ Муҳаммад Ҳабибов дар ин нишаст ба фаъолияти нимсолаи аввали  корхона баҳои баланд дода аз камбудиҳои он дар бобати хизматрасонӣ дар сатҳи байналмилалӣ изҳори нигаронӣ намуд. Дар ҷаласа оид ба ислоҳи камбудиҳои мавҷуда ба мақомоти марбутаи фурудгоҳ супориши мушаххас   дода шуд.