14 НАФАР ДОВТАЛАБИ МАКТАБҲОИ ОЛИИ РУСИЯ

Душанбе, 19 август. (АМИТ «Ховар», Мавҷуда Анварӣ). — Вазорати фарҳанги Ҷумҳурии Тоҷикистон дар доираи татбиқи барномаи давлатӣ оид ба тайёр намудани кадрҳои баландихтисоси фарҳанг, санъат ва табъу нашр 14 нафар довталабонро барои таҳсил ба мактабҳои олии фарҳанг ва санъати Федератсияи Русия  равон намуд. Довталабони тоҷик имсол ба Донишгоҳи фарҳанг ва санъати шаҳри Маскав, Академияи ҳунарҳои бадеии ба номи Строганови шаҳри Маскав, Консерваторияи давлатии ба номи М. Глинкаи шаҳри Новосибирск ва Консерваторияи давлатии ба номи М.Мусоргскии шаҳри Екатеринбург тавсия шудаанд. Инчунин, ду нафар гирандагони стипендияи Президенти Ҷумҳурии Тоҷикистон «Дурахшандагон» ба таҳсил ба мактабҳои олии фарҳанг ва санъати шаҳри Маскав равона гардиданд. Тавре сардори шўъбаи илм ва муассисаҳои таълимии Вазорати фарҳанг Хуршед Низомов мегўяд, имрўзҳо ҷараёни қабули довталабон ба муассисаҳои таълимии Вазорати фарҳанг — Донишкадаи давлатии санъати Тоҷикистон ба номи М.Турсунзода, Консерваторияи миллии Тоҷикистон ба номи Т. Сатторов, Коллеҷҳои санъат, фарҳанг, хореография, рассомӣ ва мактабҳои махсуси мусиқии ба номи З. Шаҳидӣ ва М. Атоев идома дорад. Тибқи нақша имсол 1 280 нафар довталабон ба таҳсил фаро гирифта мешаванд. Ёдовар мешавем, ки аллакай тибқи квотаи Президенти Ҷумҳурии Тоҷикистон ба Донишкадаи давлатии санъати Тоҷикистон ба номи М.Турсунзода 42 нафар дохил шуданд. Дар ин бора аз маркази матбуоти Вазорати фарҳанг ба АМИТ «Ховар» итиллоъ доданд.