БАРРАСИИ МУБОРИЗАИ МУШТАРАК ДАР ТЕҲРОН

Душанбе, 3 август. (АМИТ «Ховар», Марзия Саидова).-Имрӯз дар шаҳри Теҳрон ҷаласаи нахустини роҳбарон ва сардорони раёсатҳои мақомоти мубориза бо маводи  мухаддири кишварҳои аъзои Созмони ҳамкории иқтисодӣ /ЭКО/, ки 2 август оғоз ёфт,  ба кори худ идома дод. Аз Сафорати Ҷумҳурии Исломии Эрон дар Ҷумҳурии Тоҷикистон ба АМИТ «Ховар» итттилоъ доданд, ки дар ҷаласа намояндагони сохторҳои марбут ба маводи мухаддири  кишварҳои ЭКО,  ба мисли Тоҷикистон, Афғонистон, Эрон, Покистон, Озарбойҷон, Туркия, Қазоқистон, Туркманистон, Қирғизистон ва Ӯзбекистон иштирок доранд. Дар ҷаласа масъалаҳои тақвияти ҳамкории муштараки  кишварҳои ЭКО дар мубориза бо маводи мухаддир вобаста ба афзоиши гардиши он дар минтақа,  дар маркази таваҷҷӯҳи иштирокдорони ҷаласа қарор дорад. Тибқи иттилоъи сардори  шӯъбаи равобит бо ҷомеаи Агентӣ оид ба назорати маводи нашъадори назди Президенти Ҷумҳурии Тоҷикистон Саъдулло Раҳматуллоев,  Ҷумҳурии Тоҷикистонро дар ин ҷаласа муовини аввали Директори Агентӣ, генерал  Вайсиддин Азаматов ва мудири шӯъбаи ҳамкориҳои байналмилалӣ ва таъминоти ҳуқуқии Агентӣ Маҳмаднаим Маризоев намояндагӣ доранд. Ҳамзамон, дар ҷаласа намояндагони идораи  мубориза бо маводи мухаддири  Созмони Милали Муттаҳид ва Интерпол иштирок доранд.