МАҶМАИ НАВИ ВАРЗИШӢ ДАР ДУШАНБЕ

Душанбе, 8 сентябр. (АМИТ «Ховар», Бекназари Абӯбакр). —  Бо ибтикори Кумитаи ҷавонон, варзиш ва сайёҳии назди Ҳукумати Ҷумҳурии Точикистон ва маблағгузории ширкати хусусии «Ромсар» дар шаҳри Душанбе маҷмааи варзишӣ ва корти тениси «Тоҷварз» бунёд гардида, мавриди баҳрабардорӣ қарор гирифт.  7 сентябри соли ҷорӣ зимни маросими расман кушодашавии ин маҷмааи варзишӣ раиси Кумитаи ҷавонон, варзиш ва сайёҳӣ Маликшо Неъматов ҷавононро ба он даъват намуд, ки барои тақвият додани солимӣ ва рушди варзиш дар ҷумҳурӣ аз иншооти варзишии мамлакат самаранок истифода намуда, дар самти боло бурдани нуфузи Тоҷикистон дар арсаи байналмилалӣ саҳмгузор бошанд. Инчунин, дар толори нави варзишӣ варзишгарони ҷавон аз рӯи намудҳои мухталифи варзиш ҳунарнамоӣ карданд. Ёдовар мешавем, ки 7 сентябр Маликшо Неъматов ҳамчунин бо донишҷӯёни Донишгоҳи тиббии Тоҷикистон ба номи Абӯалӣ ибни Сино мулоқот карда, аз дастовардҳои солҳои охири ҷавонон дар ҳамаи самтҳо ёдовар шуд.