ВАКИЛОН ДАР СУҒД МУЛОҚОТ ОРОСТАНД

         Душанбе, 14 сентябр.(АМИТ «Ховар», Марзия Саидова).-Муовини Раиси Маҷлиси намояндагони Маҷлиси Олии ҷумҳурӣ Назира Ғаффорова, вакилони мардумӣ Домуллоҷон Ҷабборов, Шодӣ Шабдолов, Маҳмадшариф Нозимов, Исмоил  Талбаков ва Абдузафар Иномов бо интихобкунандагони худ дар коллеҷи тиббии шаҳри  Хуҷанд, корхонаи воҳиди давлатии «Хуҷандобуканал» ва толори маҷлисгоҳи  ҷамоати деҳоти  «Қистакӯз»-и ноҳияи Бобоҷон Ғафуров,  шаҳри Хуҷанди вилояти Суғд мулоқот карданд.          Тибқи иттилои сардори  маркази матбуоти палатаи поёнии парлумони мамлакат Муҳаммадато Султонов, дар ҷараёни мулоқот вакилон бо интихобкунандагон роҷеъ ба дурнамои  миёнамӯҳлати рушди иқтисодиву иҷтимоии ҷумҳурӣ барои се соли оянда, рушди соҳаҳои  энергетика, саноат, нақлиёт, кишоварзӣ, хароҷоти шаффофу  мақсадноки маблағҳои буҷетӣ,  содда намудани низоми андозбандӣ  ва оммафаҳм гардонидани  санадҳои меъёрию ҳуқуқии  марбут ба андозситонӣ ва соири масоили рушди ҷомеа маълумоти мукаммал доданд.          Бояд зикр кард, ки тибқи дастури Маҷлиси намояндагони Маҷлиси Олӣ муддати 10 рӯз  вакилони палатаи поёнии парлумони мамлакат дар вилоятҳои Хатлон, Суғд, Бадахшон ва ноҳияҳои тобеи марказ мулоқот менамоянд.