АВВАЛИН ФУРУДИ F-50 ДАР ДУШАНБЕ

Душанбе, 15 октябр. (АМИТ «Ховар», Мавҷуда Анварӣ).-Моҳи майи соли ҷорӣ намояндагони ширкати ҳавопаймоии «Эйр Астана» ба Душанбе ташриф оварда, масъалаи ба роҳ мондани парвозҳои доимиро дар хатсайри Алмаато-Душанбе мавриди муҳокима қарор дода буданд. Пас аз омӯзиши паҳлӯҳои иқтисодии бозори ҳамлу нақли хатсайри мазкур ширкати «Эйр Астана» тасмим гирифт, ки ҳафтае се маротиба парвозҳоро ба Душанбе анҷом диҳад. Дар мактубе, ки аз ҷониби менеҷери ширкати «Эйр Астана» Александр Небога ирсол шудааст, гуфта мешавад, ки мусофирбарӣ  дар ин самт бо ҳавопаймои F-50, ки дар ҷаҳон яке аз ҳавопаймоҳои пурарзиш ба шумор меравад, анҷом дода мешавад. Дар фурудгоҳи Душанбе намояндагии доимии ширкати «Эйр Астана» таъсис дода шуда, барои парвозҳои транзитии минбаъда ба дигар кишварҳои мамолики ҷануби Тоҷикистон омодагӣ  мебинад.