ПАРЛУМОН ҚОНУН ДАР БОРАИ ОБИ ОШОМИДАНИРО ҚАБУЛ КАРД

          Душанбе, 13 октябр.(АМИТ «Ховар», Марзия Саидова).-13 октябр вакилони палатаи поёнии парлумони мамлакат дар иҷлосияи дуюми Маҷлиси намояндагон лоиҳаи Қонуни Ҷумҳурии Тоҷикистон «Дар бораи оби нӯшокӣ ва таъмини он»-ро баррасӣ ва қабул карданд.          Вазири мелиоратсия ва захираҳои оби Ҷумҳурии Тоҷикистон Раҳмат Бобокалонов ва вакили Маҷлиси намояндагон Рустам Латипов зимни шарҳи масъалаи мазкур зикр карданд, ки ҳадафи асосии  ин қонун беҳтар сохтани вазъи таъмини аҳолӣ бо оби тозаи нӯшокӣ, солимии ҷомеа, мубориза бо бемориҳои гуногун, паст кардани сатҳи камбизоатӣ ва коҳиш додани мизони фавти одамон аст.      Қонун  кафолати  ҳуқуқии  қонеъгардонии  талаботи шахсони  воқеӣ ва ҳуқуқиро бо оби нӯшокӣ, асосҳои иқтисодии таъмини оби нӯшокӣ, кафолатҳои давлатиро оид ба таъмини оби ошомиданӣ ва асосҳои ҷавобгариро барои ҳуқуқвайронкунӣ дар бахши таъмини оби нӯшокӣ муқаррар менамояд.