ДУШАНБЕ БО ДЕҲЛӢ НАЗДИК МЕШАВАД

Душанбе, 18 ноябр.(АМИТ «Ховар», Марзия Саидова).-Ояндаи наздик хатсайри ҳавоӣ миёни шаҳрҳои Душанбе ва Деҳлӣ  кушода мешавад. Ин матлабро Сафири фавқулодда ва мухтори Ҷумҳурии Ҳиндустон дар Ҷумҳурии Тоҷикистон Аситх Кумар  Бхаттачарҷӣ зимни мулоқоташ бо Раиси Маҷлиси намояндагони Маҷлиси Олии ҷумҳурӣ Шукурҷон Зуҳуров иброз дошт.     Дипломати ҳинд гуфт, ки бо роҳандозии хатсайри Душанбе -Деҳлӣ равобити иқтисодию тиҷоратии байни Тоҷикистону Ҳиндустон густариш ёфта, дар тавсеаи муносибатҳои ҳар ду кишвар саҳифаи нав боз мегардад.       Мавриди зикр аст, ки робитаҳои иқтисодию тиҷоратии Тоҷикистону Ҳиндустон беш аз пеш густариш ёфта, то нимсолаи соли 2010 гардиши мол байни ҳар ду кишвар беш аз 20 миллион доллари амрикоиро ташкил дод. Байни ҳар ду давлат Комиссияи муштараки ҳамкориҳои байниҳукуматии иқтисодию тиҷоратӣ фаъолият дошта, заминаи қарордодиву ҳуқуқии муносибатҳои Тоҷикистону Ҳиндустонро 34 санад ташкил медиҳад.