КОРКАРДИ ЗАРИ САФЕД ДАР «ЗАРХАМ»

Кӯлоб,  26 ноябр. (АМИТ «Ховар»,  Сулаймон Холов). –  Ҷамъияти  дорои  масъулияти маҳдуди «Зархам» — и ноҳияи Кӯлоб, ки дар  ҳудуди  хоҷагии   ба номи  Мир Саид Алии  Ҳамадонӣ  ҷойгир  аст,  дар  баробари  пахтаи  хоҷагии  мазкур  маҳсулоти  дигар  хоҷагиҳои  ҷамоати  деҳоти  Даҳанаро  низ бо сифати  баланд  коркард  намуда, ба  хоҷагиҳо бармегардонад. Айни  замон  дар  анборҳои  корхона   миқдори  зиёди  пахта  захира  шуда, ҳамчунин  ҳамарӯза  аз  хоҷагиҳо  пахта қабул    мешавад.          Бояд гуфт, ки  таҷҳизоти  корхона   дар  ҳолати   хуби  корӣ  қарор  дошта, маҳсулоти  воридгардидаро  зина ба  зина  коркард  менамояд.   Имсол  боло  рафтани  нархи  пахта дар  бозори  ҷаҳонӣ  ҳавасмандии  марди  деҳқонро зиёд  намуд ва  кишоварзон бо  истифода  аз боду  ҳавои  мусоид  мекӯшанд ҳосили  парваридаи  хешро  пурра  ҷамъоварӣ намоянд. Вобаста ба ин меъёри  ворид  шудани  пахта ба  корхонаи  «Зархам»   низ  афзуд ва  мутахассисон мекӯшанд, ки дастранҷи  марди  деҳқонро  саривақт  ва  бо сифати олӣ  коркард намоянд.   Дар   корхона  мутахассисони  соҳа  фаъолиятро дар  ду  баст ба роҳ  мондаанд.   Музди  миёнаи   маоши  коргарон  380  сомониро  ташкил  дода, сари  вақт пардохта мешавад. Роҳбарияти  корхона  иброз  доштанд, ки  аз  ҳисоби  пардохти  музди  меҳнат  ва  истифодаи  барқ  қарздор   нестанд. Қарзи  андоз  ва  ҳифзи  иҷтимоӣ  пурра   пардохт  шудааст. Аз  ҳисоби  фурӯши  нахи  пахта  ба буҷаи  маҳалӣ  то имрӯз 400  ҳазор  сомонӣ  ворид  гардидааст ва  ин рақам  дар  моҳҳои  оянда  ду баробар   зиёд   мешавад