РОҲБАРОНИ ХАДАМОТИ МАХСУСИ ДАВЛАТҲОИ ИДМ БА ДУШАНБЕ МЕОЯНД

Душанбе, 5 ноябр. (АМИТ «Ховар», Фирдавс Таваров).-8-9 ноябри соли ҷорӣ дар шаҳри Душанбе ҷаласаи 29-уми Шӯрои роҳбарони идораҳои амниятӣ ва хадамоти махсуси давлатҳои узви ИДМ баргузор мегардад. Дар ин бора ба хабарнигори АМИТ «Ховар» аз маркази робитаҳои ҷамъиятии КДАМ ҶТ хабар доданд. Дар назар аст, ки дар ҷаласаи мазкур масъалаҳои рушди минбаъдаи ҳамкориҳои мутақобилан судманд дар кори мубориза ба муқобили терроризм ва экстремизми байналмилалӣ зери  ниқоби дин, мубориза ба муқобили қочоқ ва гузаронидани яроқи оташфишон,  лавозимоти ҷангӣ, моддаҳои тарканда, моддаҳои мадҳушкунанда, фаъолияти гурӯҳҳои ҷинояткори байналмилалӣ, муҳоҷирати ғайриқонунӣ ва фурӯши одамон, гардиши ғайриқонунии маводи мухаддир, таъмини амнияти ҳарбӣ ва сарҳадии давлатҳои узви ИДМ   мавриди муҳокима қарор мегиранд. Дар кори Шӯрои роҳбарони идораҳои амниятӣ ва хадамоти махсуси давлатҳои узви ИДМ ба сифати мушоҳид намояндагони мақомоти марбутаи як қатор кишварҳои аврупоӣ, аз ҷумла Германия, Италия ва Фаронса ширкат меварзанд.