ҶОНИБДОРИИ БЕШ АЗ 40 МАСЪАЛАИ МУҲИМ

    Душанбе, 16 декабр.(АМИТ «Ховар», Марзия Саидова).- 16 декабр дар шаҳри Душанбе таҳти раёсати Раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев иҷлосияи сеюми Маҷлиси миллии Маҷлиси Олии Ҷумҳурии Тоҷикистон даъвати чорум баргузор шуд.     Дар иҷлосия беш аз 40 масъалаи муҳими фарогири ҳаёти  иқтисодию иҷтимоӣ ва фарҳангии мамлакат баррасӣ ва ҷонибдорӣ гардиданд.       Аз ҷумла, аъзои палатаи болоии парлумони мамлакат Қонунҳои Ҷумҳурии Тоҷикистон «Дар бораи ворид намудани тағйиру иловаҳо ба қисми якуми Кодекси граждании  Ҷумҳурии Тоҷикистон», «Оид ба  ворид намудани  тағйирот  ба Қонунҳои Ҷумҳурии Тоҷикистон «Дар бораи феҳристҳои давлатӣ», «Дар бораи мудофиа», «Дар бораи бехатарӣ аз сӯхтор», «Дар бораи ҳимоя ва дастгирии давлатии соҳибкорӣ дар Ҷумҳурии Тоҷикистон», «Дар бораи корхонаҳои давлатӣ», «Дар бораи кооперативҳои истеҳсолӣ», «Дар бораи иҷозатномадиҳӣ ба баъзе намудҳои фаъолият», «Дар бораи  сарватҳои зеризаминӣ» ва дигар масъалаҳоро баррасӣ ва ҷонибдорӣ намуданд.       Доир ба масъалаҳои зикршуда раисони Кумитаҳои Маҷлиси миллӣ Мамадшо Илолов ва Матлубхон Давлатов табодули назар карданд. Зикр шуд, ки ҳадафи қонунҳои мазкур такмили қонунгузории кишвар, мутобиқ намудани онҳо ба санадҳои меъёрию ҳуқуқии Ҷумҳурии Тоҷикистон,  амалӣ намудани Паёми Президенти мамлакат ба Маҷлиси Олӣ, мутобиқ намудани онҳо ба тартиби нави  бақайдгирии давлатии шахсони ҳуқуқӣ ва соҳибкорони инфиродӣ тавассути «Равзанаи ягона»,  ба роҳ мондани сиёсати ягона ҷиҳати шомил шудан ба Созмони ҷаҳонии савдо, таҳкими қонуният  ва дар ин замина рушди соҳаҳои иқтисодиву иҷтимоии мамлакат мебошад.     Ҳамзамон, дар ҷараёни иҷлосия Раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев аз натиҷаҳои нахустин сафари ҳайати парлумонии  Ҷумҳурии Тоҷикистон ба Британияи Кабир ва тавсеаи ҳамкории парлумонии Тоҷикистон бо парлумони  ин кишвар гузориш дод.