АГЕНТӢ КОРГАР МЕҶӮЯД

Душанбе, 15 декабр. (АМИТ «Ховар»,  Мавзуна Бойева). — Дар  Муассисаи давлатии «Маркази таълими калонсолони Тоҷикистон»    соли равон  аз ҳисоби аҳолии бешуғл 1146 нафар шаҳрвандони шаҳру ноҳияҳои ҷумҳурӣ ба касбомўзӣ аз рӯи  ихтисосҳои  назоратчии мошини электронии ҳисоббарор (МЭҲ), муҳосиб, қаннод, барқчӣ, кафшергари барқ   фаро гирифта шуданд.  Дар ин бора  ба мухбири АМИТ «Ховар» аз  шўъбаи робитаҳои  байналмилалӣ ва ҷамъиятии Агентии давлатии ҳифзи иҷтимоӣ, шуғли аҳолӣ ва муҳоҷирати Вазорати меҳнат ва шуғли аҳолии ҷумҳурӣ  иттилоъ доданд.  Инчунин 225 нафар шаҳрвандон, ки хоҳиши бозомўзӣ ва такмили ихтисосро доштанд, ба гурўҳҳои худмаблағгузор доир ба ихтисосҳои оператори МЭҲ,  муҳосиб, кафшергари барқ  қабул   шуданд. Дар айни замон  қабули шаҳрвандон барои   ихтисосҳои  устои таъмиргар, кафшергари газӣ, дўзандаи либосҳои миллӣ,   ки талабот дар бозори меҳнат ба онҳо зиёд аст,   тавассути роҳхатҳои  раёсатҳои Агентӣ  ва ҳам дар асоси худмаблағгузорӣ идома дорад. Фаъолияти филиалҳои Муассисаи давлатии «Маркази таълими калонсолони Тоҷикистон» дар шаҳрҳои Кўлоб, Қурғонтеппа, Конибодом, ноҳияи Тоҷикобод ва дигар марказҳои таълимии зертобеи МД МТКТ  оид ба фарогирии аҳолии бешуғл, азхудкунии ихтисосҳо ва расонидани кўмаки ҳамаҷониба пайваста  зери назорати роҳбарияти  марказ қарор дорад.   Дар ин муддат аз тарафи коркунони масъули МД МТКТ  нақша ва барномаи ихтисосҳои «Коркарди сангҳои қиммат ва нимқиммат», «Рўзгордорӣ»,  «Коркунони соҳаи иҷтимоӣ» таҳия гардида, дар  Вазорати маорифи Ҷумҳурии Тоҷикистон тасдиқ  шудаанд. Бахшида ба «Соли маориф ва фарҳанги техникӣ» дар моҳи июли соли 2010-ум ярмаркаи омўзиши касбӣ  гузаронида шуд, ки дар он ҳамаи марказҳои таълимии шаҳри Душанбе, мақомоти  Агентии давлатии ҳифзи иҷтимоӣ, шуғли аҳолӣ ва муҳоҷирати шаҳри  Душанбе, литсей- интернати касбии махсуси маъюбон, ташкилоту корхонаҳои шаҳри Душанбе ширкат варзиданд.