АНГИШТИ РАВНОБ КУҶОСТ?

           Хоруғ, 6 декабр. (АМИТ «Ховар»,  Л.Додо). –   Ҳамасола дар мавсими сармо мардуми Бадахшон асосан  аз  конҳои  Шӯроб ва  Миёнаду ангиштсанг   харид менамоянд,  дар  ҳоле ки  дар ҳудуди  вилоят кони  ангишти  Равноб  мавҷуд   аст. Пас  чаро  ангишти кони Равноб ба  аҳолӣ ва муассисоти соҳаи  маориф ва тандурустии   навоҳии  вилоят  фурӯхта  намешавад? Хабарнигори АМИТ «Ховар» бо  ин  суол ба раиси ҷамоати  деҳоти  Сағирдашт Исмоил  Мирзоев, ки  кони  ангишти  Равноб  дар  ҳудуди ин  ҷамоат  ҷойгир аст,  муроҷиат  намуд. Ба  гуфти  Исмоил  Мирзоев   дар як сол  аз кони Равноб   аз  500 то  700  тонна  ангиштсанг истихроҷ  шуда,   аҳолии  ҳудуди  ноҳия бо он таъмин   мегарданд.  Аз  маркази  ноҳия то  кони  ангишт беш  аз  100 км  роҳ сӯи  баландӣ  меравад, ки  хароҷоти  сӯзишворӣ  хеле  зиёд  аст. Инчунин  бо барфи  нахустин  роҳ  маҳкаму  қариб  охири  баҳор  кушода  мешавад. Исмоил  Мирзоев  иттилоъ  дод, ки  роҳи  дигари сӯи  кон,  ки  хеле  кӯтоҳ  ва  ҳамвор  аст, кашф   карда  шуд. Солҳои  наздик  бунёди  ин роҳ  оғоз  мегардад.