ОМОДАГӢ БА ЗИМИСТОН

Душанбе, 10 декабр. (АМИТ «Ховар», Лаззат Диловарзод).- Бино ба маълумоти Агентии омори назди Президенти ҶТ, дар ҷумҳурӣ барои ба   зимистон омода намудани иншооти хоҷагии коммуналӣ ва фонди манзил тадбирҳои муайян андешида мешавад.    То 1-уми декабри соли 2010 аз 51 дегхонаи гармидиҳанда  таъмири 27 дегхона ё худ 52,9 фоизи онҳо ба анҷом расонида шудааст. Иваз намудани 326,5 км шабакаи гармирасон дар назар дошта шудааст.  Дар асл 108,9 км шабакаи гармирасон иваз карда шудааст, ки 33,4 фоизи нақшаи пешбинишударо ташкил медиҳад. Ҳамчунин,  то охири соли ҷорӣ иваз намудани 32,5 км қубурҳои садамавӣ ба нақша гирифта шудааст, ки ҳамагӣ 5,4 км ё худ 16, 6 фоизи он иваз шудааст.    То  фасли зимистон таъмири низоми гармирасонии 292 бино анҷом ёфтааст, ки 96, 1 фоизи нақшаро ташкил медиҳад. То имрӯз таъмири боми 285 бино ба поён расонидааст, ки 19,7 фоизи нақшаро ташкил медиҳад. Бо вуҷуди тадбирҳои андешидашуда омодагии иншооти хоҷагии коммуналӣ ва фонди манзил барои  зимистонгузаронӣ  дар маркази шаҳр  ба талабот ҷавобгӯ нест, ки сабаби  он нарасидани маблағ аст.