ҲИФЗИ ИҶТИМОИИ АҲОЛИ ДАР МАРКАЗИ ДИҚҚАТИ ДАВЛАТ

 Душанбе, 19 январ. (АМИТ «Ховар», Дилшодаи Ҷонмард). —  Яке аз ҳадафҳои асосии давлат дастгирии гурӯҳҳои осебпазири ҷомеа, аз ҷумла собиқадорони ҷангу меҳнат, ятимону маъюбон, пирони бесаробон ва оилаҳои камбизоат мебошад. Ин нуқтаро  Президенти Ҷумҳурии Тоҷикистон Эмомалӣ Раҳмон дар маҷлиси васеи Ҳукумати Тоҷикистон доир ба натиҷаҳои рушди иқтисодиву иҷтимоии кишвар дар соли 2010 ва вазифаҳо барои соли 2011 иброз дошт. Сарвари давлат зикр намуд, ки сол ба сол хусусияти иҷтимоии буҷет тақвият ёфта, маблағгузории он меафзояд. Соли ҷорӣ ҷиҳати ҳифзи иҷтимоии бошандагони хона — интернатҳои маъюбону ятимон ва пиронсолони бесаробонмонда дар буҷети давлатӣ 13 миллион сомонӣ маблағ пешбинӣ гардидааст, ки ба ҳар як нафар дар як сол 8600 сомонӣ ва дар як моҳ 715 сомонӣ рост меояд. Гуфтанист, ки ғамхорӣ дар ҳаққи маъюбону ятимон, пиронсолони бесаробон ва оилаҳои камбизоат ҳамеша дар маркази диққати давлат ва Ҳукумати Тоҷикистон қарор дошта, дар баробари ин ба ташкилоту муассисаҳо, ширкату корхонаҳо, хусусан мақомоти иҷроияи ҳокимияти давлатии вилоятҳо ва шаҳру ноҳияҳо низ супориш дода шудааст, ки ба онҳо доим кӯмаки моддӣ расонанд ва дар ҳалли мушкилоташон ҳамеша мусоидат намоянд.