А. РАҲМОНОВ: «САФОРАТИ ЭРОН АЙБ НАДОРАД»

  Душанбе, 11 январ.(АМИТ «Ховар», Марзия Саидова).-«Сабаби аслии ба Эрон нафиристодани беш аз 70 нафар омӯзгорони омӯзонандаи хати форсии мактабҳои таҳсилоти ҳамагонии Тоҷикистон аз бемасъулиятию хунукназарии сардори бахши равобити байналмилалии Вазорати маорифи Тоҷикистон сар задааст», гуфт вазири маорифи ҷумҳурӣ Абдуҷаббор Раҳмонов дар нишасти матбуотӣ ба хабарнигорон. Яъне, бо сабаби сари вақт пешниҳод накардани ҳуҷҷатҳо ба Ҳукумати Ҷумҳурии Тоҷикистон ва мақомоти дахлдори кишвар ва нагирифтани ризоияти Ҳукумати ҷумҳурӣ ин масъала ба таъхир гузошта шуд.   Вазир афзуд, ки дар ин масъала Сафорати Ҷумҳурии Исломии Эрон ягон айб надорад.  Мавриди зикр аст, ки дар асоси Созишнома байни Вазорати маорифи Ҷумҳурии Тоҷикистон ва Вазорати омӯзиш ва парвариши Ҷумҳурии Исломии Эрон мебоист 3 январ беш аз 70 нафар омӯзгорони бахши форсии кишвар ҷиҳати такмили курси ихтисос ба Донишкадаи такмили ихтисоси Теҳрон фиристода мешуданд. Мутаассифона, бо сабаби сари вақт пешниҳод накардани ҳуҷҷатҳо ба Ҳукумати Ҷумҳурии Тоҷикистон сафари омӯзгорон ба таъхир афтод.  Вазири маориф ҳамзамон гуфт, ки барои омӯзгорони бахши форсӣ дар Донишкадаи такмили ихтисоси омӯзгорони вазорат курси бозомӯзӣ ташкил шудааст. Баъди гирифтани иҷозати Ҳукумати Ҷумҳурии Тоҷикистон омӯзгорон ба Эрон фиристода мешаванд. Зеро Вазорати маориф ҳуқуқ надорад, ки бидуни иҷозаи Ҳукумати кишвар ин омӯзгоронро ба хориҷи кишвар фиристад, афзуд вазир.