ЛАЁҚАТМАНДҲО БА АЛМААТО РАФТАНД

   Душанбе, 5 январ. (АМИТ «Ховар», Людмила Дубинина). – Хонандагони мактабҳои таҳсилоти ҳамагонии шаҳри Душанбе дар олимпиадаи VII-уми ҳамасола аз рӯи фанҳои дақиқ, ки дар шаҳри Алмаатои Қазоқистон аз 13 то 20-уми январ баргузор мегардад, иштирок менамоянд. Тоҷикистонро дар ин чорабинии бонуфуз хонандагони синфҳои 11: аз фанни физика Рухсора Ниёзӣ (мактаби № 78), аз фанни риёзӣ Равшан Каримзода (мактаби № 15), оид ба барномасозӣ Бахтиёр Рӯзиев (мактаби № 42) намояндагӣ менамоянд.     «Ин хонандагон ғолибони озмунҳое мебошанд, ки дар шаҳри Душанбе баргузор гардидаанд. Хонандагонро имтиҳони ҷиддӣ дар пеш аст, онҳо бо ҳамсолони худ-хонандагон аз давлатҳои узви ИДМ ва кишварҳои хориҷии дур бояд мубодилаи афкор намуда, дониши худро санҷанд», — хабар дод ба хабарнигори АМИТ «Ховар» директори «Маркази рушди хонандагони болаёқат»-и раёсати маорифи шаҳри Душанбе Рустам Сафаров.