МАСТЧОҲ ВА ҚУТОСҲОИ ПОМИРӢ

    Душанбе, 6 январ. (АМИТ «Ховар», Мавҷуда Анварӣ).-Олимону мутахассисони соҳаи чорводорӣ баъди омўзиш ва гузаронидани таҷрибаҳо ба хулоса омаданд, ки зиёд намудани саршумори қутоси ҷинси помирӣ барои афзун гардонидани гўшту шир, пашму равѓан нисбатан афзалият дорад. Аз ин лиҳоз парвариши онро дар чанд минтақаи кўҳистон тавсия дода, ба натиҷаҳои назаррас муваффақ гардиданд.    Мувофиқи тавсияи олимон соли 2002 дар асоси шартномаи дуҷониба аз ноҳияи Мурѓоби ВМКБ ба ноҳияи Мастчоҳ 63 сар қутос оварда шуд ва таҷрибаи олимони соҳа собит сохт, ки иқлим, обу ҳаво ва релефи кўҳистони Мастчоҳ барои зиёд намудани саршумори қутос ва ба роҳ мондани ин навъи чорво хеле мувофиқ мебошад, зеро мутахассисон саршумори онро дар давоми ҳашт сол аз 63 ба 305 сар расонида, саршумори онро 242 сар зиёд намуданд. Олимони соҳа хусусияти хоси қутоспарвариро дар кўҳистони Мастчоҳ омўхта, барои ривоҷи парвариши қутоси ҷинси помирӣ тавсияҳои хуб доданд.    Дар мамлакат Қарори Ҳукумати Ҷумҳурии Тоҷикистон «Оид ба рушди қутоспарварӣ» ба тасвиб расидааст ва он ба зиёд шудани саршумори ин навъи чорво ва бо маҳсулоти он таъмин намудани сокинони мамлакат равона гардидааст.