ТОЗА КАРДАНИ МИНТАҚАҲОИ ХАТАРНОК АЗ МИНАҲО

  Душанбе, 18 январ.(АМИТ «Ховар», Марзия Саидова).-Самтҳои афзалиятноки ҳамкориҳои самарабахши Ҷумҳурии Тоҷикистон бо Кумитаи байналмилалии Салиби Сурх дар меҳвари мулоқоти муовини аввали Раиси Маҷлиси намояндагон Амиршо Миралиев бо сарвари намояндагии Кумитаи байналмилалии Салиби Сурх дар минтақаи Осиёи Марказӣ Ив Арнолдӣ ва сардори намояндагии кумитаи мазкур дар Ҷумҳурии Тоҷикистон хонум Олма Аҳмадипур қарор дошт, ки 18 январ дар Душанбе баррасӣ гардид.  Амиршо Миралиев гуфт, ки мардуми тоҷик аз хидматҳои ин Кумитаи бонуфузи байналмилалӣ ба хубӣ огоҳӣ доранд, хусусан дар давраи душвори солҳои нахустини Истиқлолияти давлатии Тоҷикистон Салиби Сурхи байналмилалӣ яке аз аввалинҳо шуда, кӯмакҳои башардӯстонаи худро, ки аз маводи озуқа ва доруворӣ иборат буд, ба Тоҷикистон расонид. Ба андешаи А. Миралиев Ҷумҳурии Тоҷикистон дар оянда низ омода аст, ки бо Кумитаи байналмилалии Салиби Сурх дар тамоми заминаҳо ҳамкории судманд дошта бошад. Мавсуф таъкид кард, ки ҷиҳати тавсеаи ҳамкориҳо фазои ҳуқуқӣ фароҳам буда, Ҷумҳурии Тоҷикистон яке аз аввалинҳо шуда дар соли 2009 Қонуни Ҷумҳурии Тоҷикистон «Дар бораи ҷамъияти Ҳилоли Аҳмар»-ро қабул намуд.  Сарвари намояндагии Кумитаи байналмилалии Салиби Сурх дар минтақаи Осиёи Марказӣ Ив Арнолдӣ роҷеъ ба дурнамои барномаҳои ин созмон дар Тоҷикистон иттилоъ дода гуфт, ки дар ҳамкорӣ бо Ҳилоли Аҳмари Тоҷикистон фаъолияти худро дар се бахш ба роҳ мондаанд. Ин бахшҳо ҳамкорӣ бо ниҳодҳои давлатӣ, барномаҳои тоза кардани ҳудудҳои минахобонда ва кор бо шахсоне, ки наздикони худро гум кардаанд, ба шумор мераванд.