БОЗДИДИ ПРОФЕССОРИ ТОҶИК АЗ ЭКО

Душанбе, 4 март. (АМИТ «Ховар», Марзия Саидова). — Додихудо Саймиддинов, Раиси Кумитаи забон ва истилоҳоти назди Ҳукумати Ҷумҳурии Тоҷикистон, ки ахиран ба узвияти пайвастаи Фарҳангистони забон ва адаби форсии Эрон пазируфта шуд, зимни сафар ба Эрон аз муассисаи фарҳангии ЭКО, ки дар Теҳрон мустақар аст, боздид намуд.  Додихудо Саймиддинов зимни мулоқот бо доктор Ҳуҷҷатуллоҳ Аюбӣ, Раиси муассисаи фарҳангии ЭКО  масъалаҳои тавсеаи ҳамкории Тоҷикистон бо ин муассисаи фарҳангиро баррасӣ намуд.  Додихудо Саймиддинов ба раҳбарияти ЭКО ҷиҳати баргузории ҷашнвораи байналмилалии хушнависон, ки чанде қабл дар Душанбе ташкил шуд, арзи сипос намуда, хостори он гардид, ки ҳамкориҳои фарҳангии ин муассиса бо ниҳодҳои фарҳангию ҳунарии Тоҷикистон бештар густариш ёбанд.         Назар ба иттилои коршиноси бахши фарҳангии ЭКО Шоҳмансури Шоҳмирзо, дар мулоқот мусоҳибон, ҳамчунин, масъалаҳои марбут ба тавсеаи ҳамкориҳо дар бахши ҳамгунсозии вожаҳо, истилоҳот ва таъбирҳо миёни марказҳои забоншиносии ду кишвари ҳамзабон  – Тоҷикистон ва Эронро баррасӣ намуданд.